अर्को आरम्भ- बज्र कुमार राई

अक्षरहरुको
शब्दहरुको
वाक्यहरुको
बारुद बनाएर
कलमभित्र खाँद्छु

र,विस्फोट गराउँछु
परिवर्तन रोक्ने
तिम्रो घातक टाउकोमा
बगिसकेका
बग्दै गरेका
पसिना,आँशु र रगतमा
निर्धाहरुको पिरो सपना घोलेर
कुण्ठा र उन्मुक्तिको बेलुन भर्छु
र, हान्छु

तिम्रो जिद्धे आँखामा
दबेकार दबाएका
निर्दोष लाशहरुलाई
ईतिहाँस र बर्तमानको राँको देखाएर तर्साउँछु
र उर्लाउँछु
तिम्रो बिरुद्ध
जगित्रा,मुर्कुट्टा र किचकन्निहरुको
अभावग्रस्त जुलुश

शहीदगेटमा
क्रस टाँगेर तिम्रो
छाती चिर्छु
हातखुट्टा काट्छु
जिब्रो थुत्छु
कानमा आवाज पड्काउँछु
र,गाडेर टाउकोबाट तिमीलाई
सार्वजनिक गर्छु
लौ हेर्नुस्
मुखियाको विभत्स्य हत्या !
यदी सक्नु हुन्छ त ?
छम्नुस
यसको प्रत्येक इन्द्रियहरुमा
आजसम्मका
पापीष्ट स्पर्सहरु…..।