गजल-बज्र कुमार राई

आफ्नाले'नि पराई ठाने उच्च यो शीर ढलेको बेलामा
निभाई दिने कोही छैन पीडाले मन जलेको बेलामा

दु:खहरुको पहाडमाथि जीतको झण्डा गाड्छु भन्थें
उक्लीएनन् पाइलाहरु दु:खाईले जीवन ढलेको बेलामा

हरेक अँध्यारो जिन्दगीको उज्यालोले चिर्छु भन्थें
शाहसको राँको निभ्यो आँधिहुरी चलेको बेलामा

सकारात्मक सत्कर्ममा सफल भाग्य खोजी गर्थें
हर प्रयत्न विफल भए बिधाताले छलेको बेलामा

आजका आँशुसँग भोलिका खुशीहरु साट्छु भन्थें
सपनाहरु अधुरै जले मुटुभित्रै आगो बलेको बेलामा