गजल - बज्र कुमार राई

जति गरे'नि तिम्रो निम्ति घटी भो जिन्दगी
धिकार्दै ' नि बाँच्नु पर्ने अति भो जिन्दगी

पसीनाको कमाई सारा लुट्यौ आफ्नाले नै
सुकासुका कति माग्यौं बिपती भो जिन्दगी

लटरम्म फलिदिन्छु फल खाउ सधैं भन्दा
बोटै काट्यौ ढले म त दुरगति भो जिन्दगी

हिजोसम्म जे जे भन्यौ सहीछाप गरिदिएँ
अझै के गरुँ सम्झौता असहमती भो जिन्दगी

मनमन्दिरमा राखेको'थ्यें मर्यौ देवता तिमी
मनैभित्र जलाउँदा त्यो लाश सती भो जिन्दगी