गजल - "टुहुराको यो दु:खी मनले भूलेन त आमा" - बज्र कुमार राई

आजसम्म मनको आकाश खुलेन त आमा!
टुहुराको यो दु:खी मनले भूलेन त आमा!

तड्पीएर मर्छु सधैं तिम्रो फोटो नभेटेर
तिम्रो यादमा रोपेको फूल फूलेन त आमा

आँशुमय बन्ने गर्छु रमझमको दुनियाँमा
अन्त कतै यी दुइ आँखा डुलेन त आमा

जीवनदेखि अलग्गै छु तिमीसँग मिलुँ भन्दा
सागरभित्र अनाथ ढुङ्गा घुलेन त आमा!

ममताको न्यानो माया कोहीसँग नभेटेर
कुनै काखमा निर्दोष ज्यान झुलेन त आमा!