गजल - "एउटा लाश अझै बाँचेको छु" - बज्र कुमार राई

छातीभरी किला ठोक्यौ तर हाँसेको छु
तिम्रो लागि एउटा लाश अझै बाँचेको छु

अचानोमा टुक्रा पार्यौ अब छैन बाँकी केही
तर पनि मुटु बीचमा माया साँचेको छु

पत्रपत्र च्यात्दै फाल्यौ जीवनका फूलहरु
तर त्यही संगालेर मैले माला गाँसेको छु

जताततै घाउ पार्यौ छिद्रछिद्र कलेजीमा
फेरी अर्को धनुष-वाण मैले भाँचेको छु

कुनै मीठो भाका छैन जिन्दगी उदास हुँदा
तिम्रै तालको बेजात्रामा म त नाचेको छु